Jeff Bezos sapo ka prezantuar Amazon Kindle Fire – futjen e shumëpritur
të Amazonit në fushën e tabletëve dhe të parin aparat kolor të kësaj
kompanie. Fire ka IPS panel 7-inçësh me Gorilla Glass shtresën
mbrojtëse, procesor dual-core dhe WiFi, por nuk ka kamerë dhe mikrofon.
Karakteristika më e rëndësishme është çmimi prej vetëm 200 dollarësh, që
mund të jetë edhe vendimtare në zhvillimin e tregut të tabletëve. Pse,
do të thoshit ju? Sepse Amazon është ndoshta e vetmja kompani që mund
t’i konkurrojë Apple për nga sasia e përmbajtjeve të disponueshme në
shitoren e vet online, si librat, magazinat, etj., ndërsa është duke
përgatitur edhe lansimin e video shërbimit. Përmbajtjet dhe aplikacionet
janë bërë kyç për vlerësimin e këtyre pajisjeve. Fire mundet t’i qaset
edhe Android AppStore.Fire do të jetë në disponim prej 15 nëntorit, mu në kohë për ethet e blerjeve për festat e fundvitit. Përveç Fire, janë prezantuar edhe Kindle Touch e-Ink me touch ekran me çmim prej 100 dollarësh dhe Kindle “i thjeshtë” i ri me çmim super të volitshëm prej 80 dollarësh.
